يَا عُشَّاقْ هَيَا قُومُو بْنَا فِى النَّايْرَه النَّزُور مَحَبُوبْنَا

بسم الله الرحمن الرحيم



يَا عُشَّاقْ هَيَا قُومُو بْنَا فِى النَّايْرَه النَّزُور مَحَبُوبْنَا

يَا مَوْلانا غَطِّى عِيُوبْنَا قِلْ عثرتنا وامْحَ ذِنُوبْنَا
زَكـَّى نفوسنا واحِى قلوبْنَا وأموات القلوب يَحَيُوبْنَا

فِى ذَا العام نَجدْ مطلوبْنَا نُوفى ديُّونا نُوفى طلوبْنَا
نوصى بعد جمعنا غِيُوبْنَا تَبْقَى الحجَّة مِنْ مَوْهُوبْنَا

وافرِين زادْ مَلانَ جِيُوبْنَا شَايِلينْ كلما مَرْغُوبْنَا
لا يْكون خِيْرنا يَا بَرْ دوبْنَا يوفى أحْبَابْنَا واللاذوبْنَا

أطْعَمْنَا الجمُوع دَارْ كُوبْنَا نَقَرْنَا الطَّبول دَاروبْنَا
يَهَبِكْ طَارْنا يَخَلِفْ نْوبَْنَا نَقْدم طالبين مَحََبُوبْنَا

كـُلـَّية الأهَلْ ودَّعْنَا تسَّابق غَزير ادْمُعْنَا
يَا مَحمد سعيد وَالعْنَا يَا أحمد رِيَان نَزَعْنَا

اتْوجَهْنَا مِنْها الرَّكـْنَه خَلـَّينا الوطن والسُّكـْنَه
سُقْنا العائله مادكـْدَكـْنَا حبَّ المصطفاوى مَلـَكـْنَا

يَا عَلـِى ودْ حَسَنْ يا سعيدنَا يَا محمد بَهانَ وعيدنَا
زَوْرة مَنْ بِه تأييدْنـــا رفْعَتْنَا وكَمَانْ طول ايدنَا

ودْ التَّاى لزِيم حَالتَنَا فى النَايْبَان والوالتْنَا
عِنْد البكـْرِى حَصَّالتْنَا والـْيَلـْزّمْنَا فِى تَايَتْنَا

خَدَّامْنَا البخيتْ فِى راسْنَا يَا الصديق سراجْ عَبَّ سْنَا
نَصْبِح نَمْسِى غَالِقْ سَاسْنَا بِالممْدوح غِنَى افْلَاسْنَا

خَرْطْوم بَحْرِى خَتَّ عَفَشْنَا عِنْ قَطْع التَّذاكِرْ بُشْنَا
سكْسِبْريس دَخَلـْنا وهُشْنَا فارَقْنَا النِّحوس والمشْنَا

طَبَق الوَلْعَه قَامْ شِاشيئَا مِنْ الغُبْنَا انْفَشَّيِنَا
فِى سواكنُ ضْحى خَشَّينَا حَامْدين شَاكِرين منشينا
بِيه حَلـَلـْن لايْحَه انْوارْنَا هَابْكين بالمدائحْ طَارْنَا
حَلَّ جُوَى القلوبْ مِزْمَارْنَا شَاعَتْ فِى البِرُور اخْبَارنَا

جَاتْنَا أهل الغَرامْ تِتْرَاحَحْ كَـالفَاقْدَه الـْجَنينْ تِتزَاحَح
تبكِى وتِنَّخِج تِتوَاحَح وَلـْهان القنوع والـْلاَّحَحْ

صَاحْ نَبَّاهْنَا بعد فَطُورنا دافْعِين حَلْ أجَرْ وابُورنا
فرِح القُبُّطَانْ بِعِبُورنَا فُوق المرْ تَنَامى سِرورنَا

بكره صَبَاح بِجَدَّه خَرَجُنا طَرْبَانِينْ فَرَاحه بَرَجْنَا
واحدِين مَيَّزولنا فِجَجْنَا ارتِحْنَا وعَدَلـْنَا عَوَجْنَا

عَرَبَاتْ مَكـَّة أجَّرْنَاهَا مَكـَّه رأتْنَا وأبْصَرْنَاهَا
وارْكان العَتيِقْ طُفْنَاهَا قَبَّلنَا الحَجَرْ بُسنَاهَا

نسْعى نلبى تار خببْنا والـْعينانْ دمُوع صببْنا
مِنْ مالـْنا الخليصْ أوْهبنْا لله العلى اتْأهَّبْـــــــنا

قَضَّينا المنَاسِكْ طِبْنَا زَمْزَمْ مَاه مِنْه شرِبْنَا
عَرَفَه أوزارنا فُوقَ قَلَبْنَا يُوم جمعه اسْتَلمْنا أربْنَا

أوبْنَا مَبيِتْنَا بشى مُزْدلفه نَايْلين القِبُول والزُّلفَه
بِى مُنى كَـَمْ و كَـَمْ كَـَمْ ألْفَ أصْبَحْنَا التعُوب مُنْخَلـْفه

الشَّيْطان رَجَمنَا سَبَقْنَا للهدى بَلْ شِعُورنا خَلَقْنَا
بِى عين الرَضا رَمَقْنَا العَفُو والأمان خَالِقنَا

لِبسْ الحَجْ لبسنا وقـُمْنَا عُدْن لمكه طُفنا وحُمْنَا
والحَجْ بالعُمْر تَمَّمْنَا سُوح المرتضى يَمَّمْنَا

سَادِسْ يُوم بِها حَلَّينا لى ام سور و الأمل تم لينا
شفنا الروضًّة و انْبلينَا والقبر الشريف جِدْ لينَا

رَحْمَات عِينْ رضَا والتـْنَا قَايْلِين يا لزيمْ حَالَتْنَا
جِينَ اكْرِمْنا بِى رَاحَتْنَا فِى دُنْيَان فِى آخْرتْنَا

بَاكِينْ خَاضِعينْ لـَبِّينَا حِينْ قُلـْنا السَّلامْ يا نَبِينَا
سِيْد ارْوَاحْنَا رَحَّبْ بِينَا بَشَّرْنا وحَبَان حُبِينَا

زرنا قَبَا وأحد عَقَّبْنَا ثَانِى عَلى البَقيعْ واضبْنَا
عز أكرَامنَا عَزَّ وَجبْنَا إن جَاوَرْنَا وإن كَانْ أبْنَا

بالغَدو والرَّواح فِى الخَضَرَا جَالْسِين عِنْد أمام الحَضْرَا
حَاويِنْ السِّرور والنَّضْرا بِيض ايَّامْنا زَاهُيَه وخَضْرَا

نَمكًث حَسْبَما اخْتَارَنَا نَرْجِع إنْ أمَرْنا بِدَارْنَا
نِعْمَ إن مُتْنَا حَبَّ جوارنَا سَى إن عِشْنَا عَزَّ فخَارْنَا

آلاف الصَّلا الموهُوبَه للنَّبِى والبنُون يَذْهوبَا
بِيها حَياتى يَلعَبْ هُوبَا فِى الدَّارين ومَنْ فَاهُوبَا